لائحة رسوم الفضفضة

عد دراسة بسيطة ( قد ربع ساعة وفنجان قهوة ساعة عصاري ) تم إقرار هذه اللائحة لتنظيم أسعار الفضفضة والشكوى، حرصًا على الشفافية وتفادي الاستغلال.

البند الأول – الطبيب النفسي
الأسهل والأرخص. يسمعك من غير مقاطعة، ويديك كام حركة "هز دماغ" محسوبة. الأجر: بيحدده بنفسه قبل ما تقول صباح الخير.
( Highly recommended)

البند الثاني – الزوج/ الزوجة
مستمع جيد جدًا… الأجر؟ كلنا عارفينه ومش محتاجين نشرحه.

البند الثالث – الصديق القديم
دايمًا بيبدأ كلامه بضحكة: "يا عم قول أنا حافظك وعاجنك"، وهو شايفك ازاي بقي:

الأهوج: اللي كان بيدخل الفصل من غير ما يخبط.

الساذج: اللي باع نفسه عشان بنت الجيران بدل ما يسلف صاحبه يجيب ساندوتش.

المتسرع: اللي أكل الساندوتش سخن و حرق لسانه .
… إلخ.

البند الرابع – المدير
يسمعك في نص دقيقة، وبعدين يحوّل الفضفضة لمذكرة لفت نظر:
"انت على فكرة مش مركز في شغلك، وشاغل نفسك بحياتك الشخصية."

البند الخامس – القرايب
يقدملك الحل الأبدي:
– انت علاجك تتجوز.
– طب مانا متجوز.
– إيه ده بجد؟ يبقى لازم تخلف، هينسيك الدنيا.
– طب مانا مخلف.
– يبقى لازم تخاوي الواد يبني المال والبنون زينة الحياة الدنيا، ومدام مافيش مال نجيب بنين… هو انت قولتلي انت ابن مين معلش؟

البند السادس – القهوة الشعبي
الترابيزة تسمعك كويس، والشيشة تتفهم معاناتك… الأجر: حساب المشاريب + وش كشر من القهوجي لأنه زهق من صوتك.

البند السابع – زميل الشغل
يسمعك، بس الأجر غالي: هيتسلى يحكي قصتك في أوضة المكتب كلها كـ "Breaking News".

البند الثامن – سواق التاكسي
يسمعك بالعافية، ويفتي معاك في السياسة والدين والاقتصاد كمان. الأجر: عداد + زيادة حسب مزاجه.

البند التاسع – الحيوانات الأليفة
هيسمعوك و هيدوك نظرات كلها مشاعر هتفهم انهم متعاطفين معاك بس هيبقو في الحقيقة بيستعطفوك عايزينك يا تحميهم يا تأكلهم

البند العاشر – الشوارع او البحر
و طبعا مافيش مستمع احسن من كده بس الأجر ان الناس هتقول عليك هوبا

الخاتمة:
كل مستمع ليه أجر… الفرق بس إن الأجر بيتسدد بأشكال مختلفة. أرخصهم اللي بياخد فلوس كاش و بشكل واضح ، وأغلاهم عند اللي بياخد من عمرك وصحتك على أقساط مفتوحة. اختر مستمعك المفضل وادفع الأجر نقدًا أو عينًا… وفي جميع الأحوال النتيجة واحدة: رصيدك من الطاقة السلبية يتجدد تلقائيًا.